暗踩議員苛索膚淺

煲呔曾愛將鬍鬚曾尋日喺網誌為老細補鑊，指雖然今年印花稅收有所增加，土地相關收入亦可望有可觀進帳，但根據現有資料推算，本年度財赤仍會高達四百億元。佢又話依家環球經濟雖然已見到復甦「綠芽」，但根基仍未穩固，或者會出現反覆，香港唔應該盲目樂觀。不過佢最後亦補多一句，話港府會喺較接近來年預算案發表時，根據最新數據修訂對財赤數字預測，為將來「打倒昨日的我」鋪定下台階。

鬍鬚曾又提到，之前同立法會不同黨派議員進行咗七場諮詢會，形容佢哋嘅意見「巨細無遺」，每每涉及數以百億元計公帑開支，再次令佢慨嘆公共資源有限，但社會訴求就無窮；佢又話會喺元旦之後約見不同工商及專業團體，聆聽佢哋嘅「真知灼見」，暗踩班議員苛索無窮、幼稚膚淺。不過如果佢真係咁重視啲專業團體意見，點解又會當羅兵咸永道對港府財政嘅專業分析冇到呢？

鬍鬚曾自己呻完窮同鬧完班議員洗腳唔抹腳之後，轉過頭立即又自打嘴巴，自爆會好似去年咁推出預算案諮詢漫畫，配合已播咗兩星期嘅電視短片宣傳預算案。

鬍鬚曾去年首次請街外人製作預算案電視宣傳片同漫畫冊，被批評為浪費公帑大搞個人形象工程，而且最後出嚟份預算案，不但內容被評為史上最差，喺立法會亦錄得歷來最高反對票數，顯示佢根本冇聽到透過有關宣傳片同漫畫收集到嘅市民意見，形同倒錢落海。鬍鬚曾今年仍然堅持繼續咁做，反證港府根本唔窮，真正將啲公帑亂咁fing嘅其實係佢自己！