本文重點
潮流興食得健康，尤其係上年紀嘅人更要留神，好似年屆七十五歲嘅鄉議局主席劉皇發，飲食都偏向清淡，少鹽少油，平時去灣仔佳寧娜潮州菜食飯，都喜歡點低膽固醇嘅海鮮，加多碟蔬菜就最Perfect。
無乜骨夠鮮甜
咁多海鮮之中，發叔特別鍾意冬菜蒸馬友和清蒸澳洲龍蝦，佢話好鍾意馬友魚無乜骨，啖啖肉，肉質又鮮甜，冬菜正好吊出條魚嘅鮮味。
佳寧娜店長呂欽榮話，一條馬友約重廿斤，來自南沙水域，可以凍食和熱食，凍食可蘸上豆醬，熱食就用冬菜去蒸熟。馬友本身已經好鮮甜，但冬菜更能帶出魚嘅鮮味，只要將冬菜鋪在馬友魚上，放入高溫蒸籠蒸十二分鐘就可上碟，不過魚肉質感特別滑溜，可有秘訣？店長話，先用少許豬油刴刴啲冬菜，至將冬菜放喺魚上蒸，就有咁嘅效果。
至於另一味清蒸澳洲龍蝦，最緊要用料新鮮，龍蝦蘸上甜甜哋嘅桔油，就能帶出龍蝦鮮味。
卓妮