咪睇班高官齊齊擸晒衫袖打豬流感針，又大聲疾呼叫人拿拿臨去接種豬流感疫苗，查實不過係做戲嘅咋。呢，屯門有位李女士前兩日帶住五歲大患有心臟病嘅仔仔，諗住去學生健康服務中心接種豬流感疫苗，點知白行一趟。

摸門釘唔係冇針打，而係服務中心聲稱只為健康兒童接種，叫李女士去搵醫管局喎。嘩，又會咁嘅？心臟病患者屬於高危組別，當局成日叫呢類人士快啲去打豬流感針，依家人哋嚟到又話冇得打，唔該衞生署署長林秉恩出嚟解釋吓，咁算點先？

咁都未算最離譜，李女士打電話問仔仔覆診嘅瑪麗醫院幾時有針打，對方居然話未有安排，建議仔仔明年二月五日覆診嗰陣再接種疫苗，仲話「如果等唔切，可以去私家醫生度打針」。

呢班醫療衞生高官啱啱至扮晒「先知」，話第二波豬流感高峰期好快就殺到，嗰頭衞生署同醫管局就互相卸膊，呢位小朋友屬高危組別，健康服務中心將人拒諸門外，公立醫院就叫人等多個幾月至接種。唉，等多個幾月，豬流感高峰期可能早就殺到嚟啦。正如李女士話齋，萬一個仔中招，邊個負責先？本報前日向衞生署同醫管局查詢後，學生健康服務中心至通知李女士，話係溝通出咗問題，並且即時安排佢仔仔注射疫苗。

話時話，港府為二百萬名高危人士免費提供豬流感疫苗注射，唔單止係嚟得遲，因為規劃失當，宣傳不足，監管唔到位，結果烏龍百出。例如有私家醫生被踢爆偷步打針，而且仲係為內地人同非高危人士注射。亦有醫生仲未幫人打針，已透過「醫健通」申領每針八十蚊政府資助。

衞生防護中心尋日話，計劃推出以來，診所不正當申領資助嘅個案已經超過五十宗，其中有個案已經轉交警方調查。查實衞生署系統漏洞百出，都唔知仲有幾多問題未爆出嚟。

講真，豬流感疫苗注射計劃搞到唔湯唔水，都係港府自己攞嚟嘅。呢嗱，有關計劃遲遲未能落實，但世界各地已不斷傳出注射疫苗後發生副作用甚至死亡個案，到底安唔安全，當局亦冇清楚解釋，仲要人簽「生死狀」添，你話幾牙煙吖。

依家啱啱開始注射，蝦碌嘢又一單接住一單，而且愈來愈亂，連高危人士都畀人搞到氹氹轉，你話市民仲邊可能對計劃有信心吖。再講，就算疫苗質量冇問題，但係公營醫療機構個底已經花晒，打錯針、配錯藥、開錯刀簡直家常便飯，家陣接種豬流感疫苗變咗好似賭大細咁，開大定開細，左右為難，唔驚就假！