前金管局總裁任志剛今年九月臨離任時，講過要告別繁忙嘅打工生活，學吓點樣Hea，點知佢Hea咗唔夠三個月，日前就獲內地任命做中國金融學會執行副會長。尋日港府又公布委任佢做授勳評審委員會委員，負責考慮來年度嘅特區授勳名單，證明任總都係生來辛苦命！
同任總一齊獲得委任嘅，仲有另一位「退休人士」前立法會議員劉千石，相信政府係有意搵佢接替喺該委員會服務多年、同樣來自勞工界嘅行政會議成員鄭耀棠。唔知阿石嘅加入可唔可以增加泛民成員嘅受勳率呢？
與棠哥一同被out嘅，仲有疑似特首候選人梁振英同港鐵主席錢果豐。CY喺呢個委員會前後服務咗冇十年都有八年，違反晒政府嘅「六六規定」，CY上次獲頒金紫荊星章，足足係十年前嘅事，係時候更上一層樓獲頒最高榮譽嘅大紫荊，佢今次可能只係以退為進，以免將來被指有利益衝突之嫌。