又到聖誕！今晚係平安夜，全港充滿節日氣氛，立法會議員陳淑莊（Tanya）尋晚亦同幾位青年公民嘅成員一齊喺銅鑼灣街頭報佳音，不過報嘅係不一樣嘅佳音，佢哋句句都針住港府同煲呔曾近排嘅失誤嚟唱，令人聽落會心微笑。其中有一段改編自《崖上的波兒》，大鬧煲呔曾話「當奴似碌葛」、「做特首好似一場爛尾騷」；又針對早前嘅慳電膽等事件，話要將煲呔曾「摑一巴」。歌詞抵死，連小學生都被吸引，企喺度聽足全首。唔知小朋友係因為旋律熟悉，定係連佢都認同煲呔曾認真抵打呢？