卿姐尋日向我哋證實，有財經事務及庫務局官員日前要求佢連開三節會，以便盡快通過高鐵撥款同之後幾份撥款文件，包括北大嶼山醫院工程、民政署多元化地區活動，以及立法會新大樓IT設備撥款。卿姐個人都覺得咁做唔多妥當，但為免被指刻意阻撓高鐵撥款同尊重其他議員意見，佢已經要求秘書處諮詢立法會各大黨派同獨立議員，睇吓佢哋肯唔肯同政府一齊開午夜快車傾高鐵。

議員炮轟行政霸道

我哋問過多名上周五有份拉布嘅議員意見，佢哋都異口同聲炮轟有關做法係行政霸道、破壞規矩，不利議員同官員嘅個人健康同家庭生活，堅持最多只可以兩節合共四粒鐘會議，真係傾唔晒就隔多一個星期再傾過。卿姐回應話，如果只得一、兩名議員反對，佢都可能會照開，但如果有一定數目議員唔肯開，佢都唔可以獨斷獨行夾硬嚟。

不過即使卿姐肯幫政府一把開夜車，都唔代表高鐵撥款就肯定可以如期喺八日晚通過，其一係當日緊接財會之前舉行嘅內務委員會，其中一個議程係推選甘乃威調查委員會七名成員，屆時支持同反對調查嘅議員肯定又拗餐飽，隨時趕唔切喺三點前完會，間接推遲財委會嘅開會時間。

程序多方法慢慢玩

其二係秘書處再詳細研究過財委會嘅議事程序後，發現如果議員無所不用其極拖延高鐵撥款，有大把方法慢慢玩，包括再次引用程序第39條，動議終止整個會議，雖然結果九成九九都係會被否決，但每名議員都有權就有關動議發言，隨時又拖你一粒鐘。另一個做法係引用第37a條提出其他無法律效力嘅動議，雖然該類動議唔一定要進行辯論，卿姐有權下令唔畀議員發言即刻投票，但程序就容許議員無限次咁提出該類動議，用嚟玩拉布真係一流！睇嚟到時都係有排玩。