購物並非女人專利，因為以天價掃「天匯」而一夜成名嘅香港青聯副主席秦善文唔單止鍾意買樓，買衫扮靚一樣絕不手軟，連金利來太子爺曾智雄都封佢做「購物狂」，買嘢多到唔得閒拆，真係服咗佢！
卓妮早前喺香港青聯聖誕晚宴撞到秦善文，見佢着住件LV深灰色絲絨西裝配襯同牌子皮帶，腳踏Dolce & Gabbana紅色漆皮波鞋，打扮好前衞。秦善文自爆乜都買一餐，衫褲鞋襪樣樣掃，又經常睇時裝雜誌，早前見外國型模以紅波鞋襯西裝，一於照着上身。對D&G波鞋購自新加坡，價錢約幾千蚊。
對住秦善文呢個購物狂，連身為香港青聯前主席嘅曾智雄都睇唔過眼，話佢唔買唔安樂。咪以為智雄喺度寸佢，查實兩人係沙煲兄弟，年前智雄結婚，秦善文擔正做司儀，但講到着衫口味，兩兄弟各有自好。
智雄鍾情自家品牌「金利來」，當晚戴住一條粉紅色金利來領呔，佢話屋企淨係領呔就有百幾條啦。