經濟略為復甦，市民買禮物過聖誕都手鬆啲，由東華旗下社企「樂群麵包工房」推出嘅聖誕曲奇大受歡迎，銷量較去年急升八成，工房做到應接不暇，被迫暫停接單；曲奇咁得寵，東華主席李三元開心到拍掌叫好！
由殘疾人士親手製作嘅東華曲奇一向香脆惹味，李主席早前親身去麵包房為學員打氣，吸引唔少大機構注意，賽馬會、建築署及皇仁書院等早喺聖誕前已落柯打，估唔到定單陸續有來，埋單計數爆晒燈，麵包房喺本月十八日已叫停定單。
不過，落空者唔使失望，東華今年首次喺工展會擺攤位，由今日起一連兩日義賣「樂群」曲奇，買唔到貨者可以去工展會掃貨，大禮盒裝有三款味道，包括朱古力、腰果及薑味，另外仲有細盒裝賣；東華新春仲會推出賀年曲奇添。做善事又可大飽口福，一舉兩得！