本文重點
買股票最怕坐艇，見慣風浪嘅立法會議員黃宜弘（IQ博士）就百無禁忌，唔單止獲老婆大人梁鳳儀送上近千萬嘅台灣Ruby 18M遊艇賀壽，尋日生日更加三代同堂出海，正午十二點上岸大擦海鮮慶祝，然後再出海遊多轉。所謂「人生七十古來稀」，七十有一嘅博士妻賢子孝，難怪佢尋日全程笑嘻嘻啦！
卓妮尋日約咗朋友出海，點知等船期間喺碼頭離遠見到IQ博士坐喺㗎白雪雪嘅新艇上面歎緊拔蘭地，無耐佢哋隻船泊岸，卓妮當然要埋去打個招呼啦！着住件紅色醒目上衫嘅IQ博士同卓妮揮揮手，再拖一對寶貝孫兒落船，動作敏捷，之後三代同堂一行八人去西貢食海鮮。
IQ博士落船後一夫當關負責揀海鮮，仲要唔大唔靚都上唔到佢哋張大飯枱。博士首先睇中龍蝦，拎起兩隻生猛龍蝦用左右手做秤，最後揀咗右手四斤幾嗰隻，之後再揀埋其他靚海鮮，埋單七千幾蚊，今餐唔使負責埋單嘅壽星公埋單嗰陣仲搞爛gag：「吓？千幾蚊咁抵！」在旁嘅黃太即刻更正話係七千幾呀！
IQ博士話老婆呢個生日送咗隻台灣出產嘅Ruby 18M遊艇畀佢，差唔多要成千萬，佢搞笑話︰「佢買，但係用我啲錢！不過我啲錢係佢嘅，佢嘅就係佢自己嘅。」IQ博士講時個樣勁甜，黃太聽到就勁冧。
望搵接班人磨合
IQ博士喺立法會仲有兩年任期，佢話退下來天公地道，希望明年搵到合適人選大家合作一年磨合吓，接手都好啲。
IQ博士歡天喜地同卓妮講，今年八月佢打出咗人生第一個七十二桿好成績，呢個一直係佢夢想，只要平均有呢個成績，就拍得住職業水準。人生最開心係兒孫滿堂，睇嚟IQ博士已計劃好點樣享受人生喇！
卓妮