咁匪夷所思嘅事都有，簡直係聖誕奇遇結孽緣，真係要同大家好好分享。

嗱，係咁嘅，有一位二十四歲來自內地嘅吳太，懷孕幾個月o架嘞，十一月廿一日來港之後，喺上周六深夜忽然覺得唔舒服，擔心係小產。吳氏夫婦大驚失色，即刻送吳太去廣華醫院急症室。去到醫院，醫護人員未提供治療服務，已經打電話報警拉人，佢哋檢查護照之後話喎，吳太係逾期居留。

嘩！逾期居留咁大鑊，警察梗係又拉又鎖啦，先係將吳太掟咗入去廣華醫院一間病房「隔離」，唔准吳氏夫婦接觸，到咗周日上晝，將佢轉送油蔴地警署羈押。去到下晝，吳太更加被鎖上手銬，送去紅磡警署羈留倉囚禁過夜。按照吳太嘅講法，羈留倉內好恐怖、好黑、冷冰冰，眼淚流乾都冇用，因為丈夫唔可以探佢，簡直係叫天不應、叫地不聞。

好嘞，最關鍵嘅問題係，吳太到底有冇逾期居留？如果指控屬實，咁都無話可說，鬼叫你犯法咩。奇則奇在，由來港至事發當晚，前前後後只有一個月左右，而她獲內地當局簽發有效期三個月來港探親簽注，過埋農曆新年都未到期啦，有乜理由會逾期居留先？吳先生為咗營救愛妻，奔奔波波頻頻撲撲，終於查出一個難以置信嘅真相，原來過關當日入境處職員唔知點解錯誤將逗留期限寫成「二十三日」，無端端扣減兩個幾月。於是乎，院方以為佢逾期居留，警方又以為佢逾期居留，無情白事做咗監犯。

雖然已經查明真相，可惡嘅係，警方竟然堅持要將吳太送去青山灣入境事務中心，而入境處又官僚到極，一度話要將吳太送去羅湖。擾擾攘攘幾粒鐘，吳太最終先至得以「無罪釋放」。

一個咁離奇嘅古仔講完嘞，功夫茶想問一問特區政府嘅官僚，人哋大肚婆嚟o架，粗身大勢何堪折磨呀？萬一大吉利是講句，媽咪捱唔住恐怖冤獄，肚裏面嘅小寶寶有乜冬瓜豆腐，點算呀？邊個賠得起呀？

入境處職員神神化化寫錯逗留期限，固然應該捉去痛打八十大板，等佢屁股開花過聖誕，功夫茶又想問一問經驗豐富嘅醫護人員同埋警務人員，乜閣下第一次檢查內地旅客證件咩？點解對於「二十三日」呢個咁唔尋常嘅期限冇產生疑問？其實只要停一停、諗一諗，跟手打個電話去入境處問一問，根本乜嘢事都唔會發生，唔使害到人哋擔驚受怕發噩夢吖嘛！

唉，殘待孕婦一條龍，官僚眼盲又耳聾，十足十冇靈魂嘅機械獸一樣。所以功夫茶奉勸內地同胞，以後來港過關嘅時候，記住睇清楚入境處職員有冇寫錯逗留期限，有錯即時上訴，避免冤獄重演。