事緣廉署收到選舉事務處轉介，質疑黃成智喺舊年立法會選舉期間，去文具店買咗一百六十二蚊膠紙，不過文具店老闆就實收黃成智一百六十蚊，黃成智無申報文具店老闆兩蚊雞嘅贊助，終於被廉署警告。

黃成智做議員做到甩甩漏漏，但係佢又好想囝囝文軒繼承佢衣鉢從政。可惜今年十七歲嘅文軒話自己對從政興趣不大，其實成智都明白從政之路絕不平坦，難怪佢略帶感慨咁同囝囝講，「爸爸無乜嘢可以留畀你，只有一間同黨友夾份開嘅餐廳。」睇嚟成智都已經幫自己鋪定後路啦。

可能成智畀廉署查得多，查到廉署人員同佢變咗朋友。成智話廉署人員託佢提醒參與五區總辭嘅議員，一旦宣布咗請辭就同時宣布參與補選，就會開始計算競選經費喇。