任志剛九月尾卸任金融管理局總裁，人民銀行宣布任總正式被委任做人行旗下嘅中國金融學會執行副會長，雖然呢份「工」唔受薪，大家都要問呢個職位同佢過去嘅工作有冇利益衝突，任總話：「執行副會長嘅工作係義務性質，同之前金管局嘅工作冇衝突。」
尋日中國人民銀行一眾高層喺北京出席一個論壇，人行副行長胡曉煉喺席上宣布任總嘅任命，任總跟住笑眯眯喺台上發言，雖然以後冇得Hea或要Hea少啲，但佢似乎仲開心啲，佢離開金管局個零月時曾經講過，對Hea嘅生活適應得唔係幾好。
講番任總呢個新崗位，中國金融學會係人民銀行旗下一個組織，由行長周小川做會長，下設理事會，有好多中國金融界嘅要員做成員，任總受命之後，要經常飛上飛落，總之佢衝出香港，海闊天空。任總預期，廿年後，人民幣有條件成為國際貨幣。