商務及經濟發展局主管創新科技，不過業界經常埋怨政府推動業界發展力度唔夠，局長劉吳惠蘭（Rita）尋日承諾，日後會多投放資源推動業界發展。Rita尋日喺科學園同傳媒回顧過去一年嘅工作成果，好識做咁幫襯番科技園培訓嘅公司Amos，以局方名義買佢哋研發嘅流動警報系統BoboLink，以示對業界嘅支持。
BoboLink綽號「失魂魚」，一套三件，只要將警報器分別掛喺電話、鎖匙等重要物品之上，若果其中一件物品帶漏咗，其他物件上嘅警報器都會即時響起鈴聲作出提示。Rita自嘲年紀漸大，成日都會大頭蝦唔記得帶嘢，所以先會喺芸芸創新產品中睇中「失魂魚」，遲啲仲會買番個自用添。
呢套「失魂魚」喺市面賣緊二百五十元，不過Rita一次過買成三十多套，而且以局長身份幫手做宣傳省靚個招牌，所以Amos今次以市價一半價錢賣畀商務及經濟發展局。