香港專業及資深行政人員協會會長容永祺為首嘅名人南極探險團，一行十九人完成十九日艱辛旅程，尋日安全返港做冬。令人傷感係作為探險團「盲公竹」嘅極地探險家李樂詩宣布榮休，唔再帶團，佢自稱年紀大，有限嘅體力再難應付極地嘅天氣環境，所以佢決定將帶團重任交給新一代延續下去。
名人探險團尋日下午抵港時依然龍精虎猛，最生猛嗰個係港區全國人大代表羅范椒芬，佢話旅程有兩樣最辛苦。第一樣係坐探險船由阿根廷南部城市Ushuaia出發到南極，要途經大風大浪嘅Drake Passage海峽，包括容永祺在內嘅部分團員都頂唔順暈船浪，要攤喺床上面休息。
至於第二樣辛苦就係行雪山，羅太話團員要步上一個約三百米嘅雪山，雪深過膝，舉步維艱，前行需要極大體力，佢就試過雙腳喺雪中掹唔番出嚟，要老公剷開啲雪救佢。儘管經歷幾許艱辛，但團員收穫好豐富，見到海豹和鯨魚之餘，又睇到企鵝孵蛋奇景，最難得係遇到一隻體形最大嘅「皇帝企鵝」，真係不枉此行。