立法會明年七月休會前表決政改方案，特區政府至今仲差四票，先至有望成功闖關，所以泛民若然硬推五區總辭，等如打開條罅，畀機會政府「搶票」，建制派喺無得揀下惟有全力搶灘，如果大話夾好彩鍊低泛民一、兩個，政改通過嘅機會就大好多，所以親中陣營今次總辭之戰，可謂不容有失。

建制派評估，九東、新西同新東三區最有勝算，而陣營嘅整體大方針，就係和諧為重，全面協調，希望將整個陣營嘅鐵票押注一人出戰，只許成功，不許失敗。咁即係話，最後局面極有可能係：新東同新西分別由民記嘅葛珮帆同陳恒鑌出擊，分別隻揪社民連嘅梁國雄同陳偉業，至於九東，建制派可能由工聯會陳婉嫻或「橄欖」陳鑑林上次選舉名單第二名嘅黎榮浩出戰，對撼公民黨梁家傑，關鍵係有陣營內嘅重量級人馬仍然游說緊嫻姐出山，未到埋門一刻，都唔知嫻姐會否回心轉意。

葛珮帆陳恒鑌呼之欲出

喺大和諧嘅主旋律下，建制派嘅九龍西同港島出戰名額，將會預留畀民記之外嘅其他政團協調分配，盡量做到皆大歡喜，咁即係話，自由黨田北辰好有可能會再戰九西。俗語話：邊度跌低，邊度企返起身。田二少若出選九西，都算情理之內嘅事。呢個太公分豬肉布局，最終能否成功擺陣，就要睇有關協調人士嘅功力嘞。

建制派陣營戰略既定，民記開始布陣出戰，亦愈嚟愈着迹。民記婦女事務委員會尋日搞低碳環保聖誕活動，委員會嘅正、副主席，正正就係葛珮帆同陳恒鑌。由婦委會搞環保，本來已經有啲九唔搭八，咁濕碎嘅活動竟然勞動主席譚耀宗帶隊，擺明另有所圖，搭台板畀新人出場嘅意味相當濃厚。

民記副主席蔣麗芸明言，五區總辭一旦成事，民記希望派自己嘅新人迎戰，呢個共識已獲黨內通過，仲話如果其他建制派人士覺得贏梗嘅話，咪出嚟一齊選過囉，潛台詞即係奉勸其他人守規矩，唔好差隻腳埋嚟搞搞震，同建制派陣營全面協調、避免內耗嘅戰略思維簡直係同出一轍！