同時抽中手鏈贏啞謎

由名人二代牽頭組成嘅「菁英會」將論壇搞得有聲有色，為該會打支強心針，菁英會主席施榮忻為慰勞兄弟，前晚捐出二萬元贊助晚宴，論壇籌委會主席霍啟剛等多位兄弟都自揼心口齊出力。

「菁英會」主席施榮忻（左）與女友Jaymee（右）雙雙出席慶功宴。	楊政龍（左）初次登場做司儀，表現生鬼唔怯場；楊華勇（右）亦投入玩猜啞謎遊戲。	莊家彬（右）一馬當先，唔使十秒飲晒一Jar啤酒。

聯歡會由十一月畢業嘅第八期國情研習班同學揸旗，餘興節目大玩猜啞謎遊戲及啤酒競飲，Albert及金利來行政總裁曾智明請纓上陣比試酒量，啟剛自嘲酒量淺，高掛免戰牌，但佢一早就貼中Albert「非池中物」，話佢一定贏。果然，Albert不費吹灰之力舉起勝利之杯，細妹莊家蕙high到衝上台吻賀大哥，愈戰愈勇嘅Albert轉頭贏埋猜啞謎遊戲，又抽中一條名貴Herm手鏈，連下三城，難怪同場緋聞女友傅明憲笑到見牙唔見眼。

莊家彬（右）喺亳無對手下榮登「啤酒王」，招積得有道理！ （徐家浩攝）

傅明憲執到正出席晚宴，可惜全場與緋聞男友莊家彬保持距離。

楊政龍做司儀 毫不怯場

晚宴上，「福建四小子」滿場飛，楊孫西公子楊華勇、盧文端公子盧金榮，聯同施榮忻及Albert莊四圍敬酒，副主席白富鴻落力招呼賓客，施榮忻話多得兄弟齊心發揮凝聚力，明年四月將拉大隊參加「博鰲亞洲論壇」，提升會員嘅國際視野。

啟剛都話香港論壇搞得咁成功，會繼續搞落去，不過由於前排忙到透不過氣，嚟緊都好想抖一抖，唔知佢係咪想抽多啲時間陪伴盛傳明年休戰一年嘅女友郭晶晶？

數全場最矚目者，當然唔少得Alex楊政龍。樣貌俊朗嘅Alex初次登場以流利普通話做司儀，生鬼得來又識搞氣氛，毫不怯場；佢出錢出力，送出由英皇鐘錶珠寶贊助嘅名貴鑽石頸鏈，吸引咗台下唔少注目禮。

本來想問佢會否投身娛樂圈，點知未等卓妮開口，Alex已搶先回答話：「我知你想問乜！做明星？一定唔會！」認真可惜！

卓妮