20/12/2009

播放本新聞相關短片

政情:黎年娶新抱高官撐場

今年政商界喜慶事多到爆燈,只係呢個月,已經有立法會議員涂謹申結婚及梁劉柔芬娶新抱,前晚又輪到申訴專員黎年娶新抱,其乖仔黎競成家立室,喺中環四季酒店大排筵席,一眾新舊高官及立法會議員紛紛到賀,個個一袋二袋,人到禮又到。眾賓客之中,有兩位係黎年嘅港大同學,包括公務員事務局局長俞宗怡(D姐)同食物及衞生局常秘李淑儀(Sandra),而宿友就有中策集團主席馬時亨。

D姐、Sandra與黎年同為七四年港大歷史系畢業生,舊同學娶新抱,就梗係要去飲番杯啦!至於早黎年一屆畢業嘅肥亨,做過黎年嘅港大宿友,肥亨○二年出任財經事務及庫務局局長時,黎年亦做過佢下屬,擔任該局(庫務)常任秘書長,兩人經常孖公仔出入,所以娶新抱又點少得肥亨吖!有份遴選黎年做申訴專員嘅前憲制事務司施祖祥及行政會議成員張建東都有去捧場。

林健鋒搭肥亨順風車

到賀嘅前高官仲有媽打李麗娟、公務員敍用委員會主席吳榮奎夫婦、曾任保安局局長嘅議員葉劉淑儀,其他議員仲有經濟動力林健鋒(Jeffrey)、梁君彥及專業會議石禮謙(大舊石)。做完心臟「通波仔」手術無耐嘅大舊石話,手術好順利,依家行得、食得、瞓得,多謝大家關心。

話說婚宴散席後,Jeffrey同太太搭咗肥亨順風車,肥亨二話不說,着司機執乾淨車頭左邊座位畀自己坐,後座就留畀Jeffrey兩公婆,呢個高爾夫球波友認真順得人!