身為東海聯合集團主席嘅「深圳王」黃楚標，就計劃好一家三口同外父外母一家人，去深圳東部華僑城玩三日。標哥話外父外母年紀都唔細，依家一得閒就會同佢哋周圍去玩，等佢哋享清福。東部華僑城有大峽谷、茶溪谷同雲海谷多個景點，又有標哥最鍾意嘅高球場，仲有幾個歐式主題建築群，啱晒一家大細去玩。標哥話華僑城差唔多成個大嶼山咁大，香港好難做到，淨係環保嗰關都過唔到。

夏佳理陳祖澤留港消費

東區區議會主席丁毓珠聖誕會先去澳洲探望讀緊飛機工程管理碩士嘅外孫，過個熱辣辣聖誕，再跟金怡假期老闆葉慶寧去南非，雖然要搭成十幾個鐘頭飛機，但珠姐話坐頭等唔怕腰骨痛。立法會議員譚偉豪就打算一家大細去青島。

不過，夏佳理、陳祖澤兩位馬會新舊主席同一班大董就話會留港消費，周永健話喺英國讀緊法律嘅囝囝會返香港過年，去東南亞呢啲咁熱嘅地方又無氣氛，都係留港最好；李國棟仲不忘賣廣告話留喺香港可以賽馬添，不過「愛妻號」葉錫安就要陪太太返英國探親。

圍觀者聞歌起舞，好有聖誕氣氛！

右起：李家祥、許漢忠、鄭慕智及教友一齊到機場報佳音。 （溫國佳攝）

鄭慕智拉隊機場報佳音

雖然周五先到聖誕，機管局行政總裁許漢忠、前立法會會計界代表李家祥（Eric）同「公職王」鄭慕智（Moses）尋日齊齊到機場報佳音，Moses年年都向遊客帶嚟窩心聖詩，今年唔單止有好嘅音響器材配合，仲有攝錄機將佢哋嘅演出喺全個機場播放，夠晒聖誕氣氛。

許漢忠話經濟好番啲，今年航班比去年多，機場商舖生意有改善，不過佢謙稱自己唔係專家，唔敢亂評經濟，聖誕假期佢打算同屋企人去東京梳乎吓。Eric今年唔出埠，李太話今年多朋友嫁娶，淨係呢個月都唔止十單，加上讀緊會計嘅囡囡月尾要考試，佢哋兩公婆唔想掉抵個女一個喺屋企刨書咁慘，認真廿四孝！

卓妮