美酒佳餚招呼議員

富貴門秘密飯局前日傍晚七點正開始，由於大部分議員都早到，楊生於是安排飯前活動，帶大家暢遊二萬呎大宅，並欣賞其私人珍藏嘅名畫及古董。當賓客到齊後飯局正式開始，楊生一早吩咐廚師製作一系列傳統福建家鄉菜，除咗議員誇張形容嘅手掌咁大隻鮑魚和網球咁大嘅蝦球外，仲有炸蟹鉗、手撕雞、魚丸椰菜湯、福建炒飯等佳餚。議員講就算係福建炒飯，都唔係平時食開淋上糊狀芡汁嗰種。

楊孫西嘅清水灣道大宅似「小白宮」，又似禮賓府。 （何偉鴻攝）

參與秘密飯局嘅議員，臨走都獲主人家楊孫西贈送一盒福建武夷山嘅「正岩肉桂」茶葉。

佳餚配美酒，楊生特別在酒窖攞咗多支茅台協會御用藍色樽「五十年茅台」和用木桶盛載嘅法國紅酒公諸同好，五十年茅台酒香醇程度不用多說，喺木桶開水喉斟出嘅紅酒亦令議員一試難忘。楊生又獻出上等「大紅袍」靚茶，招呼一班「開車前咪飲」嘅議員，每人臨走仲獲贈一盒福建武夷山「正岩肉桂」茶葉。

據講中聯辦主任彭清華在晚宴上發表講話，提到本港政改進程，大致為三階段，第一階段係由九七回歸至○七年，《基本法》規定本港政制發展要循序漸進及在○七年定下普選時間表；第二階段則由○七年起往後十年，相信係最多爭拗嘅十年，相信好多事情都要同建制派和泛民主派一齊坐低傾；第三階段則是二○一七年以後，進入政制發展穩定期。

卓妮事後問番秘密飯局主持人楊孫西，佢話自己係茅台協會和茶會監事長，有靚茶靚酒梗係公諸同好，加上去得佢屋企當然要食福建家鄉菜啦！