院方話就話減少咗病床，但冇增加人手，最嚴重嘅情況下，十個護士要照顧十六個病人，根本達唔到護士同危重病人一對一嘅標準比例。危重病人得唔到適當照顧，護士做到氣咳，好多人都想快啲離開。

瑪麗醫院手術室日前約有一半護士集體請病假，咪就係無聲抗議囉。佢哋不滿人手本來已經唔夠，院方為咗清理排隊做手術嘅人龍，仲要求護士每日做多四至八粒鐘，部分人甚至累積超時工作逾百粒鐘。體力不支，壓力爆煲，院方又一於少理，咪惟有齊齊「病」囉。護士請病假唔緊要，最慘係殃及池魚，有大約三十宗非緊急手術被迫延期，病人成為護士同醫管局鬥法嘅犧牲品，你話幾無辜呀。

食物及衞生局高官尋日回應事件話，明白前線員工工作壓力大，相信佢哋會將病人福祉放喺第一位，仲要求醫管局關心同事嘅需要，必要時會適當調配人手喎。

查實，瑪麗醫院手術室護士嚴重不足，唔係今日至出現。今年九月到十二月有十一個護士離職，但空缺一直冇填補。人手唔夠，手術又唔停得，護士成日要ＯＴ，但院方既唔批准補假，又唔肯補水，十個煲五個蓋，點會唔爆煲吖。家陣出咗事，當局又扮晒嘢關心「病人福祉」，簡直不知所謂！

話時話，前線人手唔夠呢個老大難問題，喺公立醫院一直存在，但當局一直無心解決，令護士怨氣愈谷愈多，已忍無可忍。除咗瑪麗醫院，九龍伊利沙伯醫院深切治療部早排亦出現集體逃亡潮，七十個護士入面有十個喺一個月內劈炮唔撈，令人手更加緊張。

至弊呢啲不過係冰山一角咋，人手不足，後果愈來愈嚴重。家陣市民睇急症，閒閒地要排四、五粒鐘，辛辛苦苦輪到，醫生診症時間平均只得五分鐘，最快嘅唔到一分鐘。咁搞法，醫療事故有乜法子唔愈來愈多吖。呢嗱，淨係舊年，公立醫院醫療事故就有過萬宗，唔怪得有病人話，對公立醫院已經冇晒信心啦。

人手嚴重不足令前線員工士氣受挫，導致公立醫院服務質素下降，醫管局管理不善固然難辭其咎，但食衞局作為直接領導機構，更加係罪無可恕。平時有問題唔解決，唔係詐傻扮懵，就係扮鴕鳥睇唔到，積積埋埋爆大鑊至出嚟扮「關心」，遲唔遲啲呀？計功夫茶話齋，最唔理病人福祉嘅，就係食衞局局長周一嶽等醫療庸官。