數廿一世紀「萬能太太」，光纖之父高錕太太黃美芸當之無愧。黃美芸尋日代夫出席喺銅鑼灣中央圖書館舉行嘅「暢談高錕教授與光纖科技」講座，黃美芸談笑風生，大爆同老公嘅生活情趣，原來高錕同太太鬧起交嚟竟然「老外」上身，既唔講廣東話亦唔講普通話，而係用英文嗌交。莫非用「雞腸」鬧交真係流暢啲？
黃美芸同高錕結婚多年，兩人如影隨形，不過夫妻間頂撞難免，尋日主持問佢同博學多才嘅老公嗌交時用乜語言，黃美芸笑騎騎話，自己係台山人，老公係上海人，但舌劍唇槍時最流利仲係講英文，好在高錕出名係開心果，同太太頂嘴只會一句起兩句止，有分寸。黃美芸又讚老公有病在身仍然幫得手，會主動倒垃圾、整理花園同修理家具。
咁到底高錕本月十日會唔會喺瑞典舉行嘅諾貝爾頒獎禮上亮相呢？黃美芸話自己都唔敢寫包單喎，大家拭目以待吧。