最貴一席四萬八

文化之夜係東亞運動會傳統項目，包括中國之夜、蒙古之夜、關島之夜、澳門之夜等，每晚都有不同特色嘅文化表演，但一切場地開支就向不同商會和團體揼心口買枱找數。好似中國之夜晚喺新會展筵開一百席，買枱價錢相當乸脷，分三個等級揼心口，包括六十席每席二萬八千元嘅黃金贊助、二十席三萬八千元嘅白金贊助及二十席四萬八千元嘅鑽石贊助，粗略估計可以近三百四十萬元，全數用作晚宴支出。

邊個團體咁抵得諗肯捱義氣買枱？咪係六大商會囉，中華總商會、中華廠商聯合會、總商會、工業總會、中國企業協會及地產建設商會，個個有份，永不落空，連香港青年聯會和香港菁英會都被拖落水。據聞呢八大商會及青年組織認頭後，就會再分銷畀旗下會董或會員，所以最平一張餐券二千三百多元，其次係三千一百元，最貴嘅餐券係四千元，真係貴到無倫！

至於晚宴節目，只係來自天津嘅舞劇院及雜技團表演，又有廣州西關小姐時裝表演，本港就會出動少林武僧耍功夫，聽到啲節目名都當堂Ｏ晒嘴。

靠副局谷人氣？

不過，睇番晚宴個嘉賓名單就與別不同，除咗有國際奧委會委員及內地省市官員出席外，仲寫上「中央政府官員」，話唔定就係來港出席東亞運開幕禮嘅中央領導人，難怪特區政府要六大商會自揼心口搞掂佢啦。

為咗谷起東亞運氣氛，政府仲下令六個副局長今日放少日假，傍晚分別到銅鑼灣、西九龍、觀塘、將軍澳、青衣及屯門六個地區，出席各商場嘅迎東亞運開幕活動，班副局長連自己嘅人氣都谷極唔起，難道谷得起東亞運？