本文重點
著名時裝設計師譚燕玉（Vivienne Tam）尋晚出席香港設計中心在會展舉行嘅設計頒獎禮及晚宴，其同名品牌早已蜚聲國際，難怪佢甫到場即被不少嘉賓邀請合照，應接不暇，仲撞到母校現任校長、香港理工大學校長唐偉章。同樣在理大設計系唸過書嘅丘雪祺，現時嘅客仔不乏城中名太，但一見到Vivienne，馬上變身小fans，跑上前與師姐打招呼，卓妮喺現場仲目擊呢一幕。
感激師姐
丘雪祺同卓妮講，佢與Vivienne相識十載，記得九九年佢從巴黎完成設計課程，返港參加一個年輕設計師比賽並奪得大獎，當時嘅首席評判正正係Vivienne，賽後佢還有機會到紐約看Vivienne嘅時裝騷，令她大開眼界，佢仲好感激師姐畀咗佢很多寶貴嘅意見。
向來支持香港設計行業嘅禧辰執行董事虞茱迪亦有出席晚宴，佢話自家代理嘅Pylones家品品牌與理大嘅My Car合作，把Pylones典型嘅波波圖案畫在車身上，尋晚仲會進行拍賣，善款將用作理大學生嘅獎學金。虞茱迪又不忘為My Car賣廣告，話依家自己只有一架車代步，考慮買多部My Car方便返工出入。