劉夢熊千金劉楚思上月廿九日結婚，喺君悅筵開多圍，楚思同老公魏文峰都係銀行界才俊，金融界高朋滿座。楚思細訴溫馨史，話同老公蜜運咗兩年，兩人齊齊喺中銀打工，朝夕相對擦出愛火，不過自從拍拖後，楚思覺得同男友喺同一間公司打工唔係太好，跳槽去另一間銀行。咁講法，豈不是為男友無咗份工？楚思望住老公甜笑，話唔介意喎，有情人開花結果，乜都抵番晒喇！

政商名人齊到賀

劉家擺完喜酒翌日，輪到陳聖澤娶新抱，喺尖東洲際酒店大宴親朋。陳主席喺政商界人脈廣，教育局局長孫明揚伉儷、立法會議員梁劉柔芬（蘇菲）及老公梁孔德、立法會議員林健鋒伉儷及立法會秘書長吳文華（Pauline）都賞面飲番杯。孫太手挽Chanel手袋登場，貴氣十足；Pauline就踩住高跟鞋搭港鐵急急腳而來，原來立法會啱啱開完會，好彩入場一刻剛開席，趕得切夾番舊燒乳豬食。