本文重點
立法會議員林健鋒（Jeffrey）、梁君彥（Andrew）、石禮謙同劉秀成四個大男人聚埋一齊除咗傾國家大事，亦愛研究食經！早幾日卓妮同朋友去灣仔富東粵菜食飯，撞到佢哋四個歎住紅酒等開飯。富東出名有三炒——炒飯炒翅炒燕窩，佢哋四個食嘢之外，仲乘機向師傅偷師學炒飯同炒翅，大舊石仲要學埋煮牛尾，呢餐都算係又食又拎囉！
大舊石愛紅酒煮牛尾
Jeffrey同富東個老闆兼主廚林永春好老友，每次去食飯，春哥一定親自招呼；即使春哥返咗內地揀食材，一收到Jeffrey要嚟食飯，都會即刻趕返嚟添！佢哋坐咗一陣，春哥預備好材料，就即席表演佢嘅招牌炒桂花翅畀各人開眼界，大家圍住佢睇表演又偷師。Jeffrey見春哥炒得起勁，忽然走埋去叫春哥畀佢炒，佢兜咗兩兜仲搞笑咁話︰「就係爭我呢兩下先夠好味！」
呢個翅用蟹黃、蛋黃、火腿絲、銀芽等配菜嚟炒，春哥炒到啲翅乾身脆口，入口時翅身軟硬適中，仲一啲肥膩感都無，非常惹味。食完翅，Jeffrey又同大家介紹春哥另一個撚手炒飯，好多人都愛用隔夜飯嚟炒，但春哥就選用新鮮飯，佢除咗做到粒粒飯都有蛋包住之外，仲炒到粒粒都外脆內軟，層次分明。
試完兩炒，春哥又攞煲紅酒煮牛尾出嚟，本來已飽飽地嘅大舊石，竟然添飯撈埋個牛尾汁唔好嘥，見佢食到以碗底向春哥致敬，有幾好味都怕唔使卓妮形容啦啩？不過唔知大舊石係咪長年累月食太多美食，兩日前要入醫院通波仔，依家仲要減肥添。
卓妮