建議係咁嘅，未獲授權而主動向公眾傳播版權作品嘅人，如將相片、電影或音樂上載至數碼平台，即使非牟利，只要傳播程度足以損害版權擁有人，亦須負上刑事責任，最高刑罰係入獄四年以及每件作品罰款五萬元。

嘩，加強打擊喎，保障版權喎，創作人應該燒炮仗慶祝啦！打造創意產業應該唔係曾蔭權瞓到懵咗流住口水發嘅春秋大夢啦！好咯好咯，香港終於唔使靠山寨老翻食飯咯，呢鋪想窮都難咯！

噯，咪住，暫停，大家千祈唔好咁快頭腦發熱。家陣只不過係建議修例咋，未知幾時實施㗎。仲有，即使《版權條例》真係修訂咗，唔代表一定會有人執法噃。即係咁，係人都知根據法例謀殺罪成要坐監啦，甚至有可能踎過世添，不過如果警察叔叔唔去捉人，冇將謀殺犯緝捕歸案，咁樣法例就形同虛設。試問，空有《版權條例》，並無執法行動，創作人權益又邊會有保障先？

退一步講，就算政府冇建議加重刑罰，其實根據現行法例，已經可以做嘢啦，侵犯版權已經可以告到甩褲啦。好可惜，官府始終係官府，豬乸始終係豬乸，完全靠唔住。

呢嗱嗱嗱，好似壹傳媒旗下《蘋果日報》網絡版「蘋果動新聞」涉嫌至少三十次持續抄襲東方報業集團旗艦網站on.cc網上新聞報道，今年二月已經向海關舉報嘞，至今無聲無息。蘋果網嘅侵權行為係非常明顯嘅，因為百分百搬字過紙，連錯別字都照抄。拖咗咁耐，莫講話東方不滿吖，連立法會議員都睇唔過眼。前幾日之嘛，立法會工商事務委員討論打擊網上盜用版權，進出口界議員黃定光高舉一張標題寫住「on.cc網上新聞　東方做　蘋果盜」嘅剪報影印本，要求當局澄清是否侵權。你估官府點答呢？商務及經濟發展局常任秘書長蔡瑩璧猛耍太極，佢話喎：不評論個別案件。

另外一單仲荒謬，受害者幫執法者捉埋賊嘞，哈，官府照樣闊佬懶理。○五年三月，有一單譚姓一家四口食咗毒帶子不適送院嘅新聞，其中一張刊登於《東方日報》頭版嘅獨家照片，竟然被《蘋果日報》以及其他傳媒盜用。東方向涉案傳媒採取法律行動，同時又向警方、海關同埋廉署舉報。期間，東方自費超過百萬元律師費提出民事索償。由於鐵證如山，包括《蘋果日報》在內嘅有關傳媒一早向東方賠償求和。即係話，東方已經透過民事訴訟捉到賊仔，人贓並獲嘞，執法部門居然一直扮盲唔做嘢，始終冇啟動刑事訴訟程序，變相縱容侵權行為。

計功夫茶話齋，擺姿勢冇用嘅，如果只係修訂《版權條例》，完全冇實際行動配合，打造創意產業始終係一個春秋大夢，煲呔曾嘅口水流到一地都係，小心跣到一仆一碌添呀！