大家可能仲記得，今年五月煲呔曾畀泛民連番追問下，喺立法會答問大會上講一句「我嘅意見就係代表整體香港人嘅意見」，之後民望大插水，連帶拖累特區政府嘅威信。尋日政制及內地事務局局長林瑞麟（林D9）畀聽眾突擊，但林D9就發揮「人肉錄音機」嘅本事，成功避過一劫。
話說前日政制改革諮詢文件出台，林D9四處出動推銷，尋日上咗電台聽市民意見，一開咪就繼續反覆講啲希望大家多發表意見嘅論調。不過就有聽眾聽到發脾氣，打電話上電台要求林D9唔好再耍官腔，以「個人身份」答佢係咪真係熱愛民主。
面對呢個突如其來嘅問題，林D9都打咗個突，不過佢好快定了定神，回復錄音機本能，話咁耐以嚟都希望香港有普選，所以會繼續爭取政府內外都取得共識，仲話好多人都接受二○一七年先普選等等，總之死都唔肯講一句熱愛定唔熱愛，遊花園遊到等聽眾忘記自己嘅問題，點知又畀佢符碌過關。不過，林D9做錄音機，總好過好似煲呔曾咁講錯嘢引起民憤。