前行政會議成員陳智思（Bernard）係大忙人，舊年唔選立法會之後，公職依然好多，不過，原來佢仲有個神秘職務好多人都唔知。香港大學一向有個「師友計劃」，搵啲傑出人士擔任學生嘅導師，而Bernard十年前就做咗呢個計劃嘅其中一個導師，仲負責帶過啲學生添，其中一個徒弟更係佢嘅忠實粉絲。
Bernard早前被委任做香港古物古蹟諮詢委員會主席後，做多咗保護古蹟及保育嘅工作，亦因為咁，佢撞番喺政府古物古蹟辦事處做考古工作嘅徒弟麥博宏Jeffer，Jeffer十年前係Bernard嘅徒弟，呢十年嚟，Jeffer一直好感激Bernard對佢嘅引導，仲剪存好多Bernard多年嘅活動剪報資料，追蹤佢嘅近況。
喺Jeffer眼中，Bernard唔單止似一粒明星，仲係一位親切、認真、尊重人嘅導師，Jeffer好記得Bernard同佢講：「有需要就搵我，一定要搵我，我會第一時間覆你。」十年來Bernard一直信守承諾，Jeffer任何時間搵佢，佢果然立即覆、親自覆，除非開緊會或者喺飛機上，回覆至會迫不得已遲咗啲。Jeffer直頭話：「我覺得佢（Bernard）係我人生最大嘅禮物！」