本文重點
一向被外界視為政務司司長唐英年家臣嘅立法會廠商會代表林大輝，前日唔知點解忽然由建制變泛民，喺立法會質問唐唐點解唔交代普選路線圖，質疑煲呔曾違反選舉承諾。大輝從政前為唐家打咗廿幾年工，即刻就畀人質疑佢曲線護主。不過尋日唐唐上電台講政改時就「唔認親」，仲即刻同大輝劃清界線添！
官同議員嘅關係？
電台主持好直接咁問唐唐，到底大輝係咪佢頭馬，唐唐大笑三聲後開始耍太極，死都唔認兩人關係好，仲話雖然大家以前係同事，但依家就係「官」同「議員」嘅關係，除咗平時做嘢會「不時溝通」，兩個就無其他關係。
唐唐將佢同大輝嘅關係撇得清清楚楚，但就略嫌刻意咗啲；唔知有無考慮過愈掩飾愈明顯嘅道理呢？其實即使唐唐同大輝事前夾過，應該都只係政府同議員「不時溝通」嘅範疇之內，唐唐其實都唔需要咁在意喎！