梁智仁做首席試食員

為求「升呢」，Annie近年四出拜師學藝，啱啱去完泰國學煮泰菜嘅佢，日前飛往西班牙度假，再轉飛英國跟星級名廚Rick Stein上一課「煮海鮮基本法」，上堂時間只得兩日，絕對係「雞精班」。不過有幸跟大師煮餸，Annie話頻撲啲都值得。Rick Stein擅長煮海鮮，佢嘅烹飪節目喺香港有得播，知名度甚高。

家人知道Annie拜名師，一於爭住跟埋去，老公兼公大校長梁智仁就堅持做「首席試食員」，唔入廚，去到英國寧願行街去也。不過大仔捷文同細仔捷鴻力撐阿媽，話要組成梁家三人組一齊上堂。

Annie話，喺英國做緊骨科醫生嘅細仔捷鴻對烹飪興趣甚濃，經常攞住媽咪出版嘅「天書」煮番幾味，喺美國從事廣告嘅大仔都唔執輸，抽空由美國飛往英國，陪媽咪、細佬上堂。

講到煮海鮮，其實Annie都係專家，佢話中國人擅長烹調蒸魚，但佢發現用清蒸方法煮石斑會弄巧成拙，事關高溫會令魚肉痙攣而變硬，將條石斑放入滾水中浸八至十分鐘，蒸出嚟嘅魚肉反而清甜嫩滑好多，大家不妨試吓。