拒糾正議員發音

粉絲當然唔肯放棄，索性連簽名筆都遞埋，范太見對方咁熱情，惟有照簽可也。范太唔吝嗇簽大名，不過講到糾正發音，就咪搞佢嘞。立法會主席日前大發神威，當眾糾正兩位立法會議員讀錯音，搞到全場嘩然，范太話唔評論對方做法是否正確，不過佢在任期間就無改過人哋讀錯字，理由係：「我自己嘅發音都有錯，唔敢去處理人哋嗰啲！」范太仲幫人哋解畫，話主席係校長出身，做事少不免按佢嘅職業背景作出反應喎，即係話人哋校長上身。

講番尋日個書畫藝術交流會，民政事務局副局長許曉暉都有份主禮，Florence主動四出派片增人氣，吸引公公婆婆爭住同佢影相。Florence自爆從小學習書法及國畫，尤其鍾意寫隸書及篆書，可惜搬咗幾次屋後作品唔見晒，反而四歲囡囡嘅塗鴉作品，就放喺家中貼堂。

范太猶豫咗一陣，粉絲索性遞埋簽名筆。	范太畀誠意打動，終於肯簽番個大名。	許曉暉自小習書畫，學會做事要心平氣和，唔好急躁。