以前班議員人前人後都會戲稱陳德霖做「攞命陳」，不過議員尋日都好畀面改口叫佢一聲「陳總」，而且大部分人發言前都恭賀佢接任總裁一職。「攞命陳」其實都好緊張立法會嘅「第一次」，一早將一份足足七十二頁兼圖文並茂嘅Powerpoint呈交立法會，會後仲印埋自己份講稿畀議員同傳媒參考。雖然兩個鐘頭嘅會議冇乜特別消息公布為佢打響頭炮，不過勝在誠意搭夠。

好聲好氣 卿姐降溫

猶記得，前金管局總裁任志剛幾乎上親立法會都同議員「駁火」，仲畀議員批評過態度「好寸」同「囂張」，當中性格火爆嘅劉慧卿更一直執住任總薪酬過高呢點窮追猛打。唔知係咪「攞命陳」上任時同意減薪卸咁啲壓力，加上佢答問題時又好聲好氣，所以議員都以禮相待好客氣，連卿姐都話希望以後同攞命陳可以多啲合作。

最尖銳嗰條，算係匯賢智庫立法會議員葉劉淑儀提出嘅，佢問「攞命陳」話，金管局喺推動伊斯蘭債券時冇考慮國家同回族之間嘅不明朗因素，再搞落去都係「緣木求魚」，言下之意即係嘥氣咁話。好彩「攞命陳」做足功課，話自己知道推動伊斯蘭債券困難重重，但「唔做就乜嘢希望都冇」，四両撥千斤成功解圍。

記得「攞命陳」做特首辦時主力選拔副局長及局長助理，之不過佢做咗多年財金技術官員，不諳政治生態，結果國籍、薪酬風波接踵而至，搞到「倒瀉一籮蟹」，依家佢回歸金管局，都算坐番啱個位喇！