本文重點
自從賭王何鴻燊入院以來，何家上下往來醫院探病頻頻撲撲，特別係港、澳兩頭忙嘅四太梁安琪，除咗全力照顧燊哥外，早前又要出戰澳門立法會選舉，真係忙到無時停，個人瘦咗成個碼。卓妮尋日喺中環置地廣場Cafe遇到四太同朋友歎下午茶，由三時十五分飲到四時四十五分，足足坐咗個半鐘，心諗為何四太咁得閒呢？原來係為咗等燊哥瞓醒之後探病，所以飲下午茶傾偈攝時間。
四太尋日穿着Causal運動衫套裝及灰色大褸，同一對男女朋友齊齊飲下午茶，見四太「面珠墩」瘦削咗好多，期間又忽然流鼻水，要問朋友攞紙巾抹鼻，唔通捱到病患上傷風感冒？非也！四太同卓妮講，自己身體無恙，只係件衫啲毛毛影響到鼻敏感啫。四太話，由於接到養和醫院通知，話燊哥瞓着咗，要等燊哥瞓醒先至可以去探病，所以當醫院一通知話燊哥瞓醒，四太就急急腳埋單走人。
「無乜聖誕Ball要去」
天氣轉涼，聖誕節將至，又係着靚衫出席Ball場嘅時間，問四太會否買新衫過聖誕？四太竟然話：「唔買囉，慳番啲錢，因為無乜聖誕Ball要去！」其實都可以理解，燊哥有機會出院返淺水灣大宅過聖誕，何家上下都做好準備等燊哥出院，屆時四太喺外國讀書嘅幾個仔女都會返齊嚟過節，試問仲邊有時間去聖誕Ball喎。
四太上周日（十五日）入馬場為愛駒「爆冷」打氣時透露，現時淺水灣大宅仲裝修緊，沙塵滾滾，為免燊哥吸塵有礙健康，所以一定要等間屋裝修好至得。四太尋日同卓妮都係咁講，話等淺水灣大宅一裝修好，燊哥就可以出院返屋企。而三太陳婉珍由前晚九點半一直喺養和醫院陪住燊哥，到尋日下午一點半至離開，佢證實燊哥農曆十月廿六（新曆下月十二日）生日，但因為中國人習慣有病就唔慶祝，所以屋企人都係唔同燊哥慶祝生日囉。
卓妮