英女王外孫女、安妮公主細女Zara Phillips前日應蘇格蘭皇家銀行邀請，首次訪港四日，尋日就去咗香港傷健策騎協會旗下嘅公眾騎術學校參觀，睇一班有特殊需要嘅小朋友點樣學騎馬嚟控制自己情緒。雖然只係參觀咗短短一個鐘，但Zara話呢種活動好有意思，仲話從來無諗過騎馬可以達至咁嘅效果添！
Zara係愛馬之人，仲勇奪馬術三項賽世界冠軍，前日一抵港就去咗跑馬地快活谷馬場參觀，唔知由細騎馬騎到大嘅佢，覺得香港嘅馬場同英國有咩分別呢？Zara就話從來都無諗過喺市中心嘅地方會起馬場，覺得興奮又得意。不過可惜今次訪港時間太短，唔夠時間畀佢試騎香港馬匹，否則可以比較埋兩地馬匹嘅分別同優劣嘞！
其實Zara今次訪港四日，日日行程都好爆，但逗留咗兩日，都仲未有時間去睇吓香港風景名勝。今日佢仲要繼續同銀行嘅職員見面同分享心得，聽日上機回程前，爭取有半日時間遊香港；但一向低調嘅Zara就唔肯講會去邊，淨係話會盡量試吓香港美食喎！