趙國雄話，同外國比較，香港就業情況算係理想，喺咁嘅前提下，樓市係有前途嘅。不過講到香港打工仔嘅處境，佢話相對就無人哋咁好，佢舉例話，內地嘅人普遍務農，想賺多啲可以出城打工，市道欠佳又可以返鄉下耕田，進可攻退可守；即使世界超強嘅美國，平日就由得墨西哥人去農場工作，一旦有需要時，又可利用反非法勞工條例，騰出部分工作機會畀番本地人。相反，香港打工仔就欠缺呢啲彈性，無咗份工真係幾徬徨。不過趙國雄係高級打工仔，睇怕無一般香港打工仔嘅煩惱啩。

講完打工仔，就講到佢自己。趙國雄話，過多兩年佢夠鐘退休啦，依家已度緊退休大計，其中一個打算係返內地養豬。趙國雄話，中國人係食豬民族，以中國龐大嘅人口計算大有可為，事關養豬除咗場地，最緊要做好衞生管理，否則一隻豬有事隨時成棚豬死晒，到時實血本無歸！睇嚟趙國雄唔係信口開河，對養豬業的確花過心思研究喎。