政府尋日宣布委任偉易達集團主席黃子欣、民建聯立法會議員陳鑑林同民主黨主席何俊仁做機管局成員。黃子欣做過執咗笠嘅甘泉航空董事，又係航空發展諮詢委員會成員；橄欖就出名係政府好朋友，成日幫政府護航擋箭，兩人入局都好正常。反而鐵頭仁嘅任命有點令人意外，一來佢係泛民第一大黨主席，政府好少有好嘢益佢，二來佢同航空業好似冇乜關係，三來機管局裏面現時已有兩名立法會議員，加埋橄欖仲有成三個咁多，睇唔到有乜特別原因要再委任佢。
不過有政界人士就分析，運輸及房屋局局長鄭汝樺（Eva）最近力推嘅廣深港高鐵項目，喺地區遇到好大阻力。今次Eva搵嚟自新界西嘅鐵頭仁入機管局，即使未能令民主黨支持高鐵，亦可以為對新西居民有一定影響嘅深港機場鐵路同機場跑道擴建買定保險，寄望連球棒都扑到斷嘅鐵頭仁，可以幫政府檔箭，唔使搞到好似高鐵項目咁狼狽同牙煙。