黑箱作業 偏幫公院醫生

負責監管全港醫生專業操守嘅醫委會，一直被外界批評黑箱作業同偏幫公立醫生，私家醫生唔小心開錯一支藥水，分分鐘都會被警告甚至停牌，反觀經常爆出嚴重醫療醜聞嘅醫管局、以及開錯藥當食生菜嘅衞生署，醫委會就極少作出調查同處分；即使有都係由基層前線醫護人員孭鑊，中高層就完全唔需要負責，對私家醫生同公眾都好唔公平。

醫委會出現上述問題，主因係二十八名醫委會委員當中，只有一半人係由醫生同醫學會選出，其餘一半都係由特首、醫管局同衞生署直接或間接委任，同立法會嘅一半功能、一半直選組成有異曲同工之妙，結果自然係處處維護政府。蔡堅今年初就透過參選醫委會主席，希望可以從內部挑戰同改革現有制度，不過最後都係一如所料敗陣而回，輸咗畀連續第三度角逐連任、被視為親政府嘅麥列菲菲。

醫委會早前以謝鴻興漏報不小心駕駛紀錄為由，取消咗佢嘅直選委員資格，就畀人質疑係對醫學會唔聽話搞搞震進行嘅一次大報復。不過有關決定最後被法庭裁定違憲，不但令謝鴻興可以恢復委員資格，醫委會估計仲要賠成四、五百萬律師費。

謝鴻興同蔡堅尋日再食住今次法院判決進行反擊，聯同醫療政策評議會召集人郭家麒召開記者會，宣布發動全港醫生網上聯署，爭取醫委會全面直選同要求麥列菲菲為呢次浪費公帑事件引咎辭職。有關行動擺明係新仇舊恨一齊嚟，不論最後係咪成功，醫委會同麥列菲菲都肯定有排煩。