秋風起，三蛇肥，大閘蟹更肥美，雖然蟹膏勁高膽固醇，但一年一次並無嚇怕一班名人闊太，佢哋紛紛瞄準農曆十月最多膏嘅蟹公。合和實業主席胡應湘（哥頓）太太胡郭秀萍和行政會議召集人梁振英（ＣＹ）夫婦分別蟹癮大發，香港廣東社團總會主席王國強更加以蟹會友，前晚筵開四席宴請總會一眾高層擦餐勁，無大閘蟹可以逃出佢哋手指罅。
卓妮早幾日下午途經銅鑼灣駱克道，赫然發現挽住Hermes手袋嘅胡太急步走入「華記永昌號」大閘蟹專門店，一手拉開雪櫃門，掃咗廿六隻每斤三百五十元嘅上等靚蟹，似乎好熟架步。原來胡太係舖頭熟客仔，每到大閘蟹季節就會叫老闆預留靚貨，但胡太本身都係揀蟹專家，佢話農曆十月蟹公啲膏最肥美，肉質比蟹乸更鮮甜，唔食就嘥晒喎！
王國強以蟹會友
大閘蟹「膏」膽固醇，唔知胡太會唔會禁制身形肥大嘅哥頓食大閘蟹呢？胡太笑言，只要聞到香噴噴蟹味，老公及愛兒胡文新一定會自動埋位歎蟹，睇怕哥頓歎完蟹之後都要跑番幾個圈至得囉！
身為金城營造老闆嘅王國強（ＫＫ）前晚亦以蟹會友，用紅酒取代花雕酒送大閘蟹，大家聯手消滅晒啲「蟹貨」，寓意金融海嘯後投資返晒家鄉。其實ＫＫ好識把握時令季節食好嘢，仲係與眾同樂嗰隻，除咗入秋搞大閘蟹宴外，夏天荔枝當造季節，又大搞東莞荔枝團，返自己家鄉嘅果園摘荔枝，任食唔嬲，屈指一算至今已經搞咗四年。
大閘蟹寒涼與荔枝燥熱都算係極端，唔係人人受得，但ＫＫ一向有做運動習慣，每日例必由屋企經舊啟德機場步行返土瓜灣公司總部，四十分鐘行程運動量十足，如果落雨，ＫＫ就在屋企踩單車，無偷懶㗎！
ＣＹ愛妻係蟹癡
講到食大閘蟹，ＣＹ兩公婆都係愛好者，梁太更加係蟹癡，鍾意大閘蟹嗰種程度連ＣＹ都難以形容。ＣＹ話，太太每次會食好多隻，但食得好慢，同佢食蟹嘅快速節奏好唔夾，每次佢食完睇住太太食，太太唔係好鍾意，無辦法啦，惟有減低食速遷就吓老婆囉！
卓妮