之不過咁，香港呢個畸形城市好鬼死得意嘅，公立醫院同私家醫院原來係唔同㗎。如果係公立醫院出事，你可以擔櫈仔坐定定，好似聽恐怖小說咁聽醫管局講古，嗱，呢間醫院輸錯血，嗰間醫院打錯針，諸如此類。如果係私家醫院咯喎，即使係醫死人咁大件事，原來係有權隱瞞真相㗎！

呢嗱，冇耐前之嘛，屬於私家醫院嘅浸會醫院接二連三出現初生嬰兒離奇死亡，假如唔係家屬爆料，外界係唔會知道嘅，因為院方照例唔會講。傳媒走去翻查紀錄啦，咁先至發覺衞生署今年頭八個月已經接獲私家醫院呈報八宗初生嬰兒非預期死傷個案，即係平均每月一宗，但係，衞生署堅決拒絕提供詳細資料，連邊間醫院出事都唔肯講，小市民全部蒙在鼓裏。

點解會咁嘅呢？因乜事幹公立醫院有必要公布醫療事故，私家醫院又可以黑箱作業嘅呢？私家醫院自己唔肯講啫，負責監管嘅衞生署點解又會助紂為虐幫手隱瞞嘅呢？

謎團，終於揭開。衞生署署長林秉恩出席立法會衞生事務委員會，親口承認公私營醫院嘅通報機制有分別，長遠應該統一兩種制度。簡單咁講，現行法例只係要求私家醫院向衞生署呈報醫療事故，不過冇規定必須對外公布。亦即係話，私家醫院「有呈報、冇公布」，絕不透明，奉旨隱瞞。

照咁講，法例係咪有漏洞呀？係咪應該修改法例堵塞呀？唔好意思，署長林秉恩原來非常搞笑，佢一方面承認兩種制度有分別，所以長遠應該統一，另一方面佢又話喎，兩種制度其實「差不多」。

呢嗱嗱嗱，讀書都讀過「差不多先生」啦，呢個係胡適筆下中國最有代表性嘅人物。勢估唔到，主理全港醫療事務嘅衞生署署長，居然「差不多先生」上身，做咗一個「差不多醫生」。根據胡適記載，「差不多先生」其實亦係醫療事故受害人，佢病到五顏六色嘅時候，本來係要去東街請汪大夫診症，點知家人幫佢搵咗西街嘅獸醫王大夫。王大夫用醫牛嘅方法幫佢醫病，結果兩腳一伸瓜老襯。「差不多先生」差不多要死嘅時候，遺言係話：「活人同死人也差……差……差……不多……」

講到呢度，功夫茶開始有少少眉目，明白點解會有咁多醫療事故。呢包血同嗰包血，差不多啫，輸血啦；呢支針同嗰支針，差不多啫，打針啦；咦，呢個病人有乳癌，嗰個病人冇乳癌，差不多啫，求求其其搵一個切胸啦！

既然林秉恩係「差不多醫生」，醫療事務由佢老哥主政，差不多可以講句，差不多九死一生！