煲呔曾施政無方已成市民的共識。政府決策亂、施政亂，尤其愛把事情複雜化，自己縛住自己雙手，退化成跛腳鴨，管治之亂已成港人的通識。當然，煲呔曾依然可以保持良好睡眠質素，一點也不出奇。大畫家李可染有兩方印章，一曰「白髮學童」，一曰「七十始知己無知」。以煲呔曾如此樂觀豁達（佢視民望如浮雲），睇怕要做咗曾祖父，八十歲然後「始知己無知」。
政府施政，為何經常予人添煩增亂的感覺？好簡單，「長者醫療券試驗計劃」就係一個活生生嘅例子：二百五十元的醫療券搞到天怒人怨，長者唔識用，參與的醫療機構又嫌繁複，已經紛紛退出，據云使用率亦不過兩成。事實上，政府如果真係有心幫吓啲長者，只要把它印成超市的購物現金券，每張五十元，任由長者使用；而參與的醫療機構則憑券向庫房換回現金或支票，這樣不是簡單得多？或者索性撥入長者戶口，那就更大方得體。
如今，政府又推出救護車調派三級制：即危急、嚴重和非危急。呢個三級制又係史上最戇居的構想，皆因求救者與接聽者彼此溝通難免有分歧，一時雞同鴨講陰差陽錯，屆時就真係死得人多也！救護車的問題，癥結在大部分救護車老化及救護人手短缺，解決的辦法是申請撥款添新車加人手，現在卻玩數字遊戲，草菅人命，無過此者。
古語云：「天下有三危：少德而多寵，一危也；才下而位高，二危也；身無大功而受厚祿，三危也。」老朽觀乎政府用人三危俱犯，加上另闢蹊徑，翻閹退休高官，果真人才難求？北大人看來要派人南下矣！