前自由黨副主席莎姐周梁淑怡再添外孫啦！講緊嘅係莎姐大女周智美，喺星期日誕下六磅重嘅男嬰，計計埋埋呢個ＢＢ係莎姐第三個外孫，仲要係周家第一個男孫。莎姐當然好開心喇，佢話雖然仔女都咁錫，但日後買嘢，終於可以買啲男仔嘅衫褲鞋襪，唔使淨係買女仔嘢。
周智美喺○七年已經誕下大女余心予，而莎姐細女周智琪就喺今年六月誕下六磅半嘅女嬰。今次男外孫早咗足足九日出世，莎姐兩位千金都習慣唔會事先知道ＢＢ嘅性別，諗住將呢個秘密等到小生命降臨時至揭曉，今次為余心予添咗個弟弟，周家上下定必十分高興。
莎姐兩個女外孫都深得優良遺傳，有一雙水汪汪嘅大眼睛，莎姐見親都嗒晒糖。今次男外孫一樣唔例外，有一對迷人嘅電眼，但就好明顯係男仔嘅相貌。
莎姐唔做立法會議員都夠晒佢忙，佢雖然唔識湊ＢＢ，但就好鍾意去探望ＢＢ，同佢哋玩。佢兩個女生ＢＢ，都有請陪月幫手，莎姐講笑話，佢可以做嘅，咪就係陪住嗰位陪月囉，總之對住ＢＢ就開心晒。