沙田各界活動委員會早前喺區內大排筵席，為區內六名獲頒勳章嘅「沙田友」慶祝，當中包括獲得「沙田第一金（金紫荊星章）」嘅玩具大王蔡志明、獲銅紫荊星章嘅工程師盧偉國及沙田鄉事委員會主席莫錦貴等。蔡志明一家大細到齊，蔡太李惠莉嘅媽媽及細妹都有撐場，場面好似擺結婚喜酒咁開心。
好多人都知蔡志明對沙田區有好大貢獻，除咗每年捐錢辦龍舟競渡外，對區內團體亦非常慷慨，早排就大手筆捐出三千萬元畀沙田體育會興建新會址。究竟蔡老闆同沙田區有乜淵源呢？蔡老闆話，七九年由九龍塘遷入沙田區居住，二十多年來認識好多沙田友，至今相當熟落，單係佢喺沙田區內嘅物業就約有二十個，其中一個係當年住過嘅九肚山物業，大部分物業主要投資嚟收租。
外孫女扭親腳打石膏
今次慶祝獲頒授勳章好多政界人士捧場，淨係蔡老闆自己都成家人到齊，包括蔡太李惠莉、大女加敏、二女加怡及細仔加讚，就連蔡太媽咪及細妹都有到場。卓妮留意到蔡家上下團結又溫馨，好似加敏乖女早前不慎扭親腳仔打石膏，蔡家各人都大為緊張，蔡太就喺ＢＢ女腳上畫咗個心形圖案，感覺好Warm。至於加讚就攬住外婆，又為外婆整理衣領，避免酒樓冷氣引致着涼。
加讚識女仔要問家姐
講開加讚早前開設嘅甜品店，佢話生意幾好，但初開業樣樣都要親力親為，幾困身㗎。咁豈不是無時間拍拖？加讚話：「無對象，第日多啲時間先啦！」咁有無女仔埋身？加怡就爆料話：「有呀！」媽咪有否催拍拖？加讚話：「媽咪無所謂，爸媽思想都好潮，自己都唔會亂嚟，除非我到咗四十歲都仲係單身啦！」識女仔係咪要過家姐嗰關呢？「係呀！家姐要求好高！」
卓妮