時裝觸覺唔係單單用錢就買到，蔡志明太太李惠莉同大女蔡加敏就係一個例子。兩母女尋日現身跑馬地馬場，佢哋一個用Prada、一個孭Chanel。加敏用嘅係最新款嘅Chanel限量版粉紅色絨毛布2.55手袋，佢本身開名牌手袋店，有專人去歐洲入貨，要買最潮貨色一啲都唔難。至於蔡太嘅窩釘Prada，要三萬蚊先有交易，雖則係四、五年前嘅限量版，不過窩釘今季大熱，依家用都好潮，證明蔡太深明人着衫嘅道理，唔係盲目追名牌。
加敏雖然有個身價幾萬蚊嘅新袋，不過佢睇嚟有啲心事，原來佢十七個月大嘅囡囡兩星期前跣親要打石膏。依家加敏為咗專心照顧囡囡，連工都返少咗。所謂養子方知父母恩，難怪佢忍唔住讚身旁嘅媽咪好偉大。
同場嘅林大輝唔知係好彩定黑仔，佢兩隻馬「確奇妙」同「極奇妙」都有落場跑，前者以冷門身份第一次跑第一，淨係獨贏都分成四百元，不過佢有事遲咗入場，睇唔到愛駒精彩演出，有佢撐場嘅「極奇妙」就跑梗頸二，兩場馬加埋，有六十萬幾獎金。