新人事新作風，啟山擔任港小總揸弗人，將小型足球重新包裝，比賽配合強勁節拍音樂，過場期間加插體操表演，總之唔會有悶場。

郭炳江技癢踢幾分鐘

啟山第一次搞賽事，好多世叔伯都出席撐場，嘉賓名單星光熠熠，爸爸霍震霆一早就到，仲有新地集團副主席兼董事總經理郭炳江、立法會議員林大輝、足球總會主席梁孔德等，而香港明星足球隊就由曾志偉率領。

全日高潮係港小總邀請隊對香港明星足球隊，啟山以隊長身份率領港小總出戰，郭炳江亦一時技癢，落場踢咗幾分鐘，前香港足球先生山度士負責分波，雖然佢哋最終以四比六輸波，不過全場焦點落喺啟山身上。上半場全靠啟山夠勤力，救出一個空門機會，下半場「一cup一射」入咗球靚波，入球後全場為佢鼓掌，而啟山亦興奮到繞場一周，同一眾「粉絲」擊掌。