任總喺網誌講，退休後每日都過得好充實同好忙，佢特別提咗幾個退休之「最」：最開心係無論喺網上或者街上，都收到好多市民送上友善祝福；最唔慣無秘書、司機用，乜都要親力親為；同埋最大成功感，係「依家我已經可以喺手機上用中文手寫板，雖然寫得好慢，但希望慢慢會有進步，同埋喺電腦應用」。活到老學到老，任總退咗休，果然有大把嘢要學，仲樣樣都覺得好新鮮。

至於任總嘅第四之「最」，讀來更加可圈可點，任總話，退休生活最令佢覺得困難嘅，「係唔能夠Hea落嚟，放唔落國際金融形勢，放唔落香港金融狀況，放唔落金融市場對經濟民生嘅影響」，仲話會好好計劃點樣適當咁為香港貨幣及金融發展繼續作出貢獻咁話。任總咁放唔低，傳佢會做央行顧問，點會係捕風捉影嘅炒作呢？