香港老牌名校拔萃男書院為社會孕育出唔少成功人士，今年係男拔建校一百四十周年紀念，兩位校友港大醫學院院長李心平同教育局副局長陳維安日前提起母校，都有一番故事。
自幼立志當詩人嘅李心平，一九六三年喺男拔中五讀文科。佢十六歲會考嗰年，父親肺癌離世，李心平哀痛之餘亦改變志向，希望日後當醫生，拯救別人嘅父親。幸好當年男拔校長郭慎墀批准佢中六棄文從理，結果李心平順利考入港大醫學院，展開醫學生涯。佢慨嘆依家嘅醫科生太物質主義：「醫學院唔係職業培訓所，為社會地位同搵錢而入行嘅諗法係錯嘅。」
擁有多間名牌大學學士同碩士頭銜嘅陳維安喺拔萃由幼稚園讀到中六，但十三年嚟從未試過考第一，最叻嗰次係中五，考第二，當時佢仲以為搞錯咗。中二嗰年，老師請陳維安食「藤條炆豬肉」：「嗰次有同學寫匿名信投訴領袖生，老師話投訴應該具名，之後拎起支藤條每個學生打一下屁股。」今時今日，已經唔可以對學生施行體罰，不過嗰次陳維安被老師打屁股，反而學會「做得出，唔怕認」嘅道理。
