煲呔曾今年份施政報告喺民生同民主方面交白卷，自己更捲入慳電膽益親家同雷曼迷債益弟婦等利益衝突醜聞，立法會第三度否決對佢嘅致謝動議原議案，大家絕對唔會感到意外，但原來餘下四項由泛民提出批評施政報告內容嘅修訂案，亦有唔少建制派倒戈支持，反映煲呔曾政府嘅管治危機正在不斷加劇，喺立法會嘅支持鐵票跌至只得約三分之一。

議員不滿漠視窮人苦困

四項修訂之中有兩項關乎政制、兩項涉及民生，其中由民主黨黃成智提出，對煲呔曾完全漠視貧富懸殊加劇及貧窮人口激增問題表示遺憾嘅修訂，就有多達三十六張贊成同棄權票，投反對嘅僅得二十一人，但由於無法同時喺地區直選同功能組別分組取得過半數支持，先至技術上通過唔到，顯示大部分議員其實都非常不滿煲呔曾漠視窮人苦困。

泛民計盡都只得二十三名議員，多出嚟嗰十三人自然係嚟自建制派，其中五散人同匯賢智庫嘅葉劉淑儀都倒戈投咗贊成票，工聯會四子、勞聯李鳳英、旅遊界謝偉俊同專業會議梁美芬就投咗棄權票，如果計埋另一「反曾」建制派自由黨嗰三票，煲呔曾嘅支持鐵票就只係剩番二十張，僅僅夠全體議員嘅三分之一。

睇番煲呔曾過往兩份獲得立法會致謝嘅施政報告，○七年嗰份其實除咗通過原議案之外，亦同時通過咗四項由泛民提出嘅修訂，其中一項係講明對煲呔曾表示失望嘅，嚴格嚟講根本唔算係致謝。○八年嗰份更加係喺煲呔曾其後認衰補鑊，加碼將生果金無條件增加至一千蚊之後，先至獲立法會勉強通過嘅。換言之佢任內五份施政報告份份都係千瘡百孔、劣評如潮，點計都係肥晒佬。