由香港友好協進會主辦嘅二○○九港區全國政協及人大活動日，一連兩日喺深圳舉行，重頭戲高爾夫球賽尋日喺深圳高爾夫球會舉行，近百五名政協、人大及嘉賓，晨早七點浩浩蕩蕩出發，經過一輪苦戰，結果由全國政協港澳台僑辦官員王聯端同金利來集團行政總裁曾智明（Ricky）分別奪得總桿和淨桿冠軍，經濟動力立法會議員林健鋒（Jeffrey）以十八洞八十二桿，屈居總桿亞軍，喺港區政協中最好，堪稱實力派！
男子組分十三組進行，每組四人，身為主人家嘅友好協進會主席陳永棋，與中聯辦主任彭清華、政協委員盧文端及黃楚標齊齊打第一組，與Jeffrey同組嘅係另一經濟動力核心兼上屆亞軍梁君彥，Jeffrey面對政壇戰友絕不手軟，打出高水準，成功摘下總桿亞軍。其實Jeffrey幾乎每星期都打一次golf，返內地就去東莞觀瀾湖或深圳西麗湖，喺香港就去粉嶺高爾夫球會。Jeffrey比賽前一晚因陌生床瞓得唔好，好彩尋日開球、短桿、推球都好順手，仲喺第三洞打出比標準桿低一桿嘅小鳥（birdie）。
李大壯抽雪茄打波
所謂「工欲善其事，必先利其器」，Jeffrey教路，打高球最緊要戴防紫外光太陽鏡兼着防水鞋，高球衫佢最愛Asworth呢個牌子，鍾意佢設計簡單兼剪裁靚，着落好舒服，高球鞋佢最鍾意美國牌子Footjoy。咁啱得咁蹺，今次嘅主人家陳永棋家族公司，都係Asworth代理商之一。
奪得淨桿冠軍嘅Ricky尋日感冒未清，狀態遜預期，但仍然成功打出小鳥，計埋抽籤所得嘅讓桿分數，以七十三點四桿打十八洞嘅佳績奪冠。攞過總桿冠軍嘅盧文端最終未能蟬聯，但都力保淨桿亞軍，而去年嘅淨桿冠軍李大壯今次雖然三甲不入，但見佢全程邊打波邊抽雪茄，睇落似「釣勝於魚」，享受過程多於名次。
政協自揼心口贊助
出席嘅政協唔少都自揼心口贊助活動，好似黃楚標就提供全部酒店嘅食宿；得利鐘錶董事長梁偉浩就贊助名錶三百隻；盧文端則捐出咗一百八十八套運動衫連帽。
活動另一高潮，係前晚嘅聯歡晚會，深圳市委書記劉玉浦、深圳代市長王榮及中國高爾夫球協會副主席王軍等都畀面出席，坐足全程，冇人中途離席，眾人仲借此機會為晚會幕後功臣、協進會秘書長李祖澤慶祝七十五歲大壽！
卓妮