27/10/2009

播放本新聞相關短片

政情:同僚嘲大舊石惹火

今年雙春兼閏月,政商界喜事多籮籮,立法會議員陳鑑林前晚娶新抱,喺迪士尼樂園酒店筵開三十三圍大宴親朋,近三十位議員到賀,包括近期被指協助煲呔曾弟婦提早攞番雷曼賠償嘅「曾朋友」石禮謙,有議員趁機幽大舊石一默話 :「你呢期變咗惹火尤物喎!」大舊石畀同僚寸出面,當堂無晒癮。

橄欖大公子陳俊傑前晚小登科,與從事銀行業嘅女友Ada拉埋天窗;話晒首次做老爺,橄欖廣發「紅色炸彈」畀議員及高官。前晚所見,建制派議員統統到齊,包括工聯會黃國健、自由黨張宇人、專業會議梁美芬、經濟動力林健鋒及匯賢智庫葉劉淑儀等。

橄欖娶新抱高官撐場

高官都賞面,財爺曾俊華、財經事務及庫務局局長陳家強、商務及經濟發展局局長劉吳惠蘭、運輸及房屋局局長鄭汝樺都嚟埋,不過除咗陳家強留低開餐外,其餘三位高官恭喜完就走人。飲過新抱茶嘅橄欖全晚笑唔停,話希望盡快有孫抱。班議員錫住佢,係咁意舉杯飲兩啖,未有向佢隊酒。不過,對於幫煲呔曾弟婦幫到出晒面嘅大舊石,大家就無咁易放過佢,有議員暗寸佢係「惹火尤物」,點起政治火頭,大舊石聽見呢個「朵」都知無好嘢,惟有苦笑一下。