Annie梁許安璞這個名字相信大家唔會陌生，她貴為公開大學校長梁智仁太太外，仲係不斷鑽研佳餚嘅烹飪能手，曾經在○七年初出咗本烹飪書《安璞滋味》，與大眾分享烹飪心得。咪以為貴價食材先至煮到好餸，在Annie嘅烹飪哲學裏，大眾化食材都能夠化為神奇，卓妮前日（廿三日）咁啱遇到她到灣仔道街市買餸，於是靜靜雞跟埋去濕漉漉嘅街市偷吓師。
卓妮見Annie對灣仔道一帶街市好熟架步，停低座駕後就一個箭步走到一間雞檔買隻「皇健雞」，原來買雞都有好多學問。最好味係黃油雞，好香雞味，但缺點係多油多膽固醇，食落無咁健康，「皇健雞」相對健康啲，食得多都唔怕。
買雞揀蟹夠晒熟手
搞掂隻雞後，見Annie又走到海鮮舖揀蟹，咁多種蟹之中，佢揀咗澳門奄仔蟹，即係膏蟹同肉蟹嘅幼年處女蟹，約三個幾月大，貪啲蟹膏和肉夠嫩口。買完主菜，跟住要買啲新鮮蔬菜和士多啤梨等生果。不過，有啲食材係街市無得買嘅，Annie就要到太古廣場地庫間「Great」入貨，包括空運到港嘅新鮮無花果及Rum酒（冧酒），冧酒係用來做甜品嘅。
煮八人餸菜無難度
Annie晨咁早去街市買餸，當然唔會冇原因。原來梁校長前晚在山頂家中宴請一班舊同事敍舊，所以要勞煩Annie預備八人餸菜，其實莫講話八人，幾十人餸菜都難不倒佢。Annie又同卓妮講，買咗咁多食材，埋單都係一千七百元左右，究竟Annie點樣變出一枱美味菜式呢？張餐單係咁嘅：頭盤包括醃羊仔骨、巴哈馬火腿Pizza及金必多湯；主菜就有西式秘製焗奄仔蟹、燒焗釀八寶乳豬；至於甜品就係「Rumbaba」，用冧酒調校，發酵後加入生果配料。睇完張菜單後，發現原來Annie一早已買定啲羊仔骨及乳豬做準備。
Annie一個人煮咁多菜睇落似乎好辛苦，但原來她身邊有個跟咗佢十幾年嘅菲籍男傭工幫手，至今傭工已有她五至六成烹飪功力，當然有啲烹飪竅門係Annie先至識做啦！
卓妮